කදිම දිව ඔසුවක්

ගුණයෙන් අනූන කිතුල් පිටි

           අතීතයේ අපේ මුතුන්මිත්තන් විසින් ආහාරයට ගත් විශේෂ ආහාර වර්ග බොහොමයකි. අද මෙන් පිටි සහ ක්ෂණික ආහාර වර්ග බහුල නොවූ එකල පෝෂදායී ආර විශේෂය රැුසක් තිබුණි. එකී ආහාර විශේෂ අතර කැඳ වර්ග විශේෂ තැනක් ගනී. ඒ අතරිනුත් කිතුල් පිටි කැඳ සුවිශේෂී වූයේ ය. එහි ඇති ඖෂධීය වටිනාකම එයට බලපෑවේ ය.


         
       උස් කදුකර බිම් ප‍්‍රදේශයන්හි වැවෙන කිතුල් ශාකය එතරම් සුලබ නොවන තාල වර්ගයේ ගස් විශේෂයකි.මෙම ගසේ හට ගන්නා මල පිපී අවසන් වනවාත් සමගම ගසේ ආයු කාගය ද අවසන් වේ. එවිට එම ගස් කඳ කපා පළා එහි බඩය ඉවතට ගෙන එය කොටා වතුරට දමයි. එහිදී කිතුල් පිටි වතුර භාජනයේ පතුළට එකතු වේ. එය පෙරා අනතුරුව අව්වේ ලා හොඳින් වියලා ගනී.  වියලා ගත් කිතුල් පිටි භාවිතයෙන් කිතුල් අලුවා, කැඳ සහ තලප සාදා ගනී. 

     
     ගැස්ට‍්‍රයිටීස් හෙවත් අමිල පිත්ත රෝගීන් සදහාත්, රක්තවාත වැනි උෂ්ණාධික රෝග ආදියෙන් පෙලෙන්නන් සඳහාත්, ඝණ ආහාර ගත නොහැකි අය  සඳහාත් කිතුල් ආහාර ගුණදායක වේ.

       
        ශීත ගුණයෙන් යුත් කිතුල් පිටි කැඳ  උදෑසන හිස් බඩට පානය කළ හැකි නම් ඉහත සදහන් කළ රෝග සියල්ල සදහාම බෙහෙවින් හිතකර වේ. විශේෂයෙන්ම ගැස්ට‍්‍රයිටීස් රෝගීන්ගේ කුස තුළ ඇසිඩ් නිපද වීම මර්දනය කරමින් වමනය සහ උගුරට ඒම මැඩ පවත්වයි.රසයෙන් වගේම පෝෂණීය ගුණයෙන් ද කිතුපිටි හෙබි නිසා ඝණ ආහාර ගත නොහැකි රෝගීන් සදහා ද ශක්තිය වැඩි වීමට මෙම ආහාරය ප‍්‍රමාණවත් වේ. මෙය ශීත ගුණයෙන් ද යුතු ආහාරයක් වන නිසා උෂ්ණාධික රෝගීන් සදහා ද හිතකරයි.

       පොල් කිරි මිශ‍්‍ර කරමින් සාදා ගන්නා කිතුල් පිටි කැඳ හොඳින් පැසෙන තුරුම ළිප තබා හැඳ ගෑ යුතු ය. එසේ නොකළහොත් ඒවා කැටි ගැසෙයි. එය හොඳින් පැසුණු බව දැන ගැනීමට හැකි වන්නේ කැඳ භාජනයෙන් නැගෙන ගොජ ගොජ හඬ සහ මතු වී බිඳී යන බුබුළු මගින් ය. මෙය හැදි ගාමින් බොහෝ වේලා ළිප තැබීමෙන් කිතුල් තලප සාදා ගැනීමට හැකි ය. ඇතැමුන් මෙයට මුං ඇට පියලි, කජු කැබලි සහ වියලි මිදි යන දෑ එකතු කොට එහි රසය තවත් වැඩි කර ගැනීමට උත්සහ දරයි.

ඉතා රසවත් මේ ආහාරය සීනි සහිත නිසා දියවැඩියා රෝගීන් නිතරම ආහාරයට නොගත යුතු ය.




                                                                        - මුතූ ඩිලානි -